Es goht uf d'Seniore Früehligsfahrt,
an de drei Jschtygsorte sind alli parat:
59zig Fraue und Männer düends hüt woge,
s'Wätter isch leider echli durzoge.
Freudig überrascht stiege mir in FCB Car-
der Sägesser Doppelstöcker Luxusbus, jo klar!
Es hett no Bärner derbi, wo händ grossi Bedänke,
wenn der Cello der FCB-Wappebus dur s'YB-Gebiet duet länke!
Ab em Bölchetunnel gohts de ab der Autobahn
nach Herzogebuchsee Wynige, bequem im Luxuskahn.
Euse Chauffeur, der Cello, dä weiss so viel
über d'Gegend, über d'FCB-Mannschaft und ihres Spiel
Interessanti Anekdote, Spass und viel zum Lache,
was är erläbt uf sine Fahrte und au anderi Sache!
Bald gohts uf schmale Näbewäg bärguf gäge d'Lueg
är rüeft "hebet d'Ohre hindere de gits zum Fahre Platz gnueg "
Verbie z' Affoltere bi der Schaukäserei und bi der Kambly-Fabrik
do zeigt sich plötzlich sogar d'Sunne es chlises Stück.
Mir chöme jetzt zum gröschte Buech vo der Schwyz:
ins schöne Entlebuech, das isch kei Witz!
Mit de Gondle gohts uf 1500 meter zur Marbachegg,
der Näbel chunnt und d'Sunne isch wegg!
Ohni Schratteflue und Alpesicht löhnd mir eus nit verdriesse,
mir düend s'feine Aesse und d'Musik derzue gniesse!
Für s'Schwyzerörgeli Trio gits Applaus mit Chränzli,
Einigi vo eus finde grad Luscht für es Tänzli!
Mir chlatsche für d Fraue, wo eus händ bedient,
für d'Chuchimannschaft, es händs alli verdient!
D'Wirtin erklärt eus d'Alpe-Panorama-Ussicht
wo me hüt nit gseht, derzue d'Bärghuus-Gschicht.
Uf der Heimfahrt d'urs grüene Entlebuech
gits im Städtli Willisau de au no en Bsuech!
So goht dä gmüetlechi Dag im schöne Zämesii
mit de Seniore leider scho bald verbii!
Am Cello und eusne Organisator:inne danke tuusigmol,
d'Freud isch gross uf es Träffe s'Nöchschti Mol!
Text: rz / Bilder: Div Senioren
Teilen
PDF-Version
Alle Berichte